عن مرور القانون الجديد

في هذا القانون الجديد, المليء بالتهديد والوعيد
وقال ايه هيخلي كل مواطن مبسوط وسعيد
نجد غرامات وفلوس وحبس أكيد
ونجد ما لم نراه عند قريب او بعيد

من حبس لاستخدام المزمار بدون اسباب كالحمار
او غرامة لأنك لا تملك حقيبة الاسعاف الجبار
او لأنك نسيت رخصتك فتذهب الى السجن بكل وقار
وبالتأكيد ممنوع الأكل او التدخين او انك تعمل في العربية زار

تناسى اصحاب القانون الجديد ما معنى التغيير
وان التغيير المفاجيء لن يأتي الا بالوبال على شعبنا الخطير
الذي لن يفتأ أن يتفنن في الاختراع والتحوير
لحد ما يوصل لمرحلة مفيش مخالفات مالوزير للغفير

مهو كلو محصل بعضو وكلو بيعدي
وقبل اي لجنه كلو بيهدي
ومالآخر عندنا مصيبه تجيب ومصيبه تودي
والوقتي اللي عنده عربيه اقوله انا على رجليا منتاش قدي


الباب اللي يجيلك منه الكمين
سيبه خالص وادخل يمين
والا هيقفشك الظابط ويعملك عجين
ولا كأنه داخل معركة حطين


المهم ان الحزام لازم كله يلبسه
واللي في بقه كلام يسكت ويدفسه
والا هيلاقي مخبر على اقرب بوكس يرفسه
ويحزن عليه اهله وباقي عمره يتعسه


قانون جديد وكل قانون وانتوا طيبين
وعلى اللي ملوش لازمه متجمعين
وعلى اللي ليه لازمه منفضين ومش فاضيين
بكره يجيلكم قانون يقول محدش يركب عربية شاهين


ولا يحطلك اتنين لتر بنزين 80 على بطاقة التموين
ويقولك بعد كدا مفيش الا خمسه وتسعين
ربنا يخليلنا احلى ناس بتطلع احسن قوانين
قولوا امييييين يا رب العالمين

حكايات المهز لدين الله 3

بينما كان مسطول سائر , إذ هالهُ ما وجدَهُ دائر , فبينما هو سائر في وسط البلد , وجدَ نطاقًا من اخترقه انجلد , وخلف النطاق الكثير من الأدخنة , وعربات إطفاءٍ عتيقة معفنّة , وخلف كل هذا القلق , كان مبنى مجلس الشورى قد احترق !

ثار مسطول وهاج وماج , وحاول اقتحام السور في اعوجاج , وقام يرفع يده في الصلاة , ويقول يا رب الطف بشعب المهز لدين الله , وارحمهم قليلاً من الكوارث , حتي يظل لكل فرد منهم وارث , ولم يكد ينتهي من صلاته , حتى استجاب الله دعواته , فقد رأى هليوكبتر قادمة , فقال بالتأكيد ستكون للحريق عادمة , ولكنها كانت صادمَة , فقد رأى مسطول البرميل الخطير , يهبط الى النيل فيمتليء فيطير , وقد كانت هذه فضيحة من العيار الثقيل المتناهي , للقوات المسلحة لفخامة المهز لدين اللهِ

وقد كان الناس البلهاء شامتون , ويقولون عقبى لقصر فخامتهِ المصون, غيرَ مدركين حجم الكارثة الكبيرة , فحكومتهم على أي حال حقيرة

وأدرك مسطُول الصباح , فنام ونفسه خالية من البراح , وبهِ ما يهِ من جراح

حكايَات المهز لدين الله 2

بينما كان مسطول نائم , إذ جاءه خبر حاسم , كأنّه على أنفاسهِ جاثم , فنهض من النوم مسرعًا , وخرج من بيته جائعًا , حتى وصل إلى الشاطيء المسموم , فوجد من عليه ما بين مذلول ومكلوم , والناس من هول ماحدث , تنظر وقد انحبس منها النفس , تنظر إلى جثث كثيرة سليمة , وفي عيونهم نظرة أليمة , فالبعض من الناس قد التهمه القرش , وقد هربَ منّا كبير حجم الكرش , فبشكل ما هو المتسبب في هذه الكارثة .. وغرق عبّارة قديمة بائسة .

مات من الناس ما يزيد عن الألف , ومن نجَا فقد انقطع منه الخلَف ,وبدأ الناس يبحثون عن القاتل , فاكتشفوا أنّه في لندن نازل , وأن حكومتهم الرشيدة القوية , هي من هرّبته بزيف الهويّة , لأنّه قد شاع بينا الناس , أن هذا الرجل عديم الاحساس ,الهارب من ضحاياه , هو حبيب للمهز لدين الله , ويومًا بعد يومٍ من الحوادث , ايقن الناس بكارثة الكوارث , وأن هذا الوغد الحقير , له في السلطة باع كبير , ولو شاء ألف ألف وليس ألف , فلن يحاسبه احد على ما ارتكب من تلف , وخاصّة وأنّ له محامٍ فلتَة , , لا تفوته هفوةٌ أو ثغرَة , منذ زمن باع هو الآخر الضمير , فلا حاجة له به ما دام يقبض الكثير

دارت الأيَام في بلاد المهز لدين الله , وارتفعت جميع الأيدي إلى الله , ولكن يبدو أن الصدق لم يكن دائم , فعندما جاء الحكم النهائي المفترض أنّه حازم , جاء مخيبًا لجميع التوقعَات وكأن المجرم من روسيا والقاضي من أخرى من المجرات , ورغم أنّ الحكم قد يكون ظالم , وقد يكون الجميع عالم , فقد آثروا جميعًا سياسة الصمت , التي أدت بنا إلى الذل وتقديس الحكم ونيل الموت .

وقد آثر شعب المهز لدين الله الاستمرار , في الصمت حتى لو جاء القرار , بإعدام كل الشعب قطعةً واحدَة , أو قتله ببطء كل واحدٍ وواحدة , والحقيقة أنّ الشعب كان يستحق هذا المصير , فليرتووا اذن من الصمت الحقير

وادرك مسطول الصباح , فسكت عن الكلام المباح , ونام وبهِ ما بهِ من جراح

حكايات المهز لدين الله 1

كان مسطول يشكي , وفجأة بدأ يحكي : يحكي يا جدعان , انه في زمن من الازمان , كان يحكم ملك شديد , ومن خلفه استعمار فريد , فقامت ثورة كبرى , وكان الملك من الأسرى , أما قائدو الثورة , فقد أرسوا مباديء العدل وتوزيع الثروة , وعملوا بهذا من الأعوام عشرين أو خمس وعشرين , حتى رئيس جديد , زعم أنه كان في الثورة صنديد , وأن كل الأبطال العظام , كانوا في الواقع أوهام , وأنّه وحده البطل , وقائد النصر في معركة الهطل , حيث قاد حينئذ القوات الجوية , الى بطولة كبيرة قوية , جعلته سيد العرش , كبير حجم الكرش ملك ملوك الشعب وراعي سياسة السلام لا الحرب , ومد أواصر الصداقة مع اسرائيل , ولو سال من دمنا الف سيل وسيل

وأدرك مسطول الصباح فسكت عن الكلام المباح

يتبع !

الحرب على كل الجبهات .. والرشوة في جيوب البهوات !

الحرب على كل الجبهات , أسلوب جديد أو قديم تتبعه الحكومة المصرية , لا اعلم متي بدأ حقًا ولكنّه السائد حاليًا ربما منذ غرق العبارة واتجاه الانظار صوب كاس الامم , لكن الخلاصة هو ان تفاقم الازمات يؤدي الى شيوعها جميعًا مهما حاول الجميع المقاومة

هتقولي وضح يا عم الحاج هقولك جاي آهوه

عشان الحكومة عندنا تمشي بيع عمر افندي تعمل ايه ؟ , تقطع المية عن نص محافظات مصر , آه والله , ده النظام عندنا .. يعني مثلا حديقة حيوان الجيزة هتتباع ومصنع البتروكيماويات بتاع دمياط هيكمل والغلاء الفاحش هيزيد و الوزير فلان العلاني هيتفضح فضيحة جديدة والمعتقل تلان الخلاني هيتحبس بدون سبب , وكل مشكلة من دول هيروحلها شوية وطبيعي انهم مش هيكونوا كافيين لانها تنتهي وبديهي ان كل فساد هيكمل غصب عن الكل !

دحنا حكومتنا بلوى مسيّحه اللهم صلي عالنبي

النقطة التانيه الخاصة باللي اختشوا ماتوا بقه , انا بقالي فترة كل اما اعمل محضر في احد اقسام مصر الاقي الامين بيقولي بعد ما يسبكه عايزين نجيب شوية ورق وقلمين !

وهي لمن لا يفهم , انا كنت زيه في الاول واستغبيت وسألت الامين وقلتله يعني ايه ؟ وانا مالي ؟

قال لي عايزين نجيب شوية ورق وقلمين !!

قلت يمكن الداخليه مزنوقة ولا حاجه في الاقلام والورق ولا احنا داخلين على ازمة مع الصين ولا حاجه قلتله طيب ثواني يا عم هجيبلك شوية ورق وقلمين !

لقيته بيمسكني وبيقولي لتالت مرة

عايزين نجيب شوية ورق وقلمين

ساعتها فهمت انّه طلب رشوة صريح خاصة لما دخلت اكتر من قسم بعدها وكل اما اعمل محضر ضياع حاجه او اثبات حاله الاقي موضوع الورق والقلمين ده طلع

وفي كل مرة مبعرفش اعمل ايه بالظبط , اللي بعمله بقوله معلش الفلوس اللي معايا انما عايز اجيبهم ورق وقلمين لنفسي وامشي وانا موقن ايقانًا تامًا

بان اللي اختشوا ماتوا !

الحكومة وامريكا والاخوان !

قبل كده كان في مقال ليا بعنوان بين النظام والاخوان عن سيناريو مجلس الشعب 2005

المقال هنا

http://kawarith.blogspot.com/2007/06/1.html

طبعًا اللي بيحصل على الساحة السياسية حاليًا مهزلة بكل المقاييس , من اول المحاكمات العسكرية للمدنيين وهي لمن لا يعرف زي بالظبط تطبيق قانون الزواج الاسلامي على مسيحيين !

طبعًا النسبة الكبرى في المدنيين دول لجماعة الاخوان المسلمين اللي اتعرضت لتشويه كبير جدا في الاعلام المنافق او من التيار السلفي المناهض على أرض الواقع , واخيرًا آخر الفضايح الأهرام بتعلن ان جماعة الاخوان المسلمين كانت على اتصال بأمريكا , بغض النظر على صحة الموضوع ده من عدمه فالخبر في حد ذاته بيؤيد المثل القديم الحكيم : اللي اختشوا ماتوا

ليه بقه اللي اختشوا ماتوا , لأن نفس التهمة اللى الحكومة بتتهم الاخوان بيها المفروض الشعب يحاكم الحكومة بيها , احنا متورطين مع امريكا توريطات مالهاش آخر ولله الحمد , آخر فضيحة للحكومة في الموضوع ده موضوع حرب العراق و الاكتر من 30 الف طلعة جوية من المجال الجوي المصري وال 800 بارجة حربية اللي عدوا من قناة السويس بأمر الحكومة !

ده في حرب العراق اللي حصلت في عهد الرئيس مبارك وحكومته اللي بتتهم بالاتصال بأمريكا , اصل أمريكا دولة وحشة وهدفها ايذاء الامة ومالهاش دعوة بالمصلحة العامة والخ الخ وبناء عليه فالاخوان عملا وبيتصلوا بالمخابرات الامريكية وامريكا ومصر اكتشفت الموضوع ده أخيرًا ..

كأن الشيخ حسن البنا الله يرحمه راح قعد مع الحاج اميرجو فسيوبيتشي واتفقوةا على تبادل المعلومات في مقابل الانقلاب على الرئيس مبارك ومن يومها وهي رسالة تتناقلها الاجيال حتى وصلت الى المرشد والجماعة الحالية بس الريس ناصح وكشف المخطط وهيحبطه

يااااااااااه

صحيح

اللي اختشوا ماتوا

الواد بلال والقلة المندسة , وعمرو أديب وقلّة الشرفاء

يمكن في ناس كتيرة هتعترض على رايي في الموضوع ده وده شيء أنا واثق منّه

بس انا هفوله وهنتكلم بمنطق اقنعني واقنعك وعارف ان محدش فينا هيقنع التاني

زمان كان فيه واحد اسمه حمدي قنديل بيطلع على القناة التانيه في برنامج اسمه رئيس التحرير وكانت الدنيا كلها متابعاه من اصغر فلاح في مصر لاتخن كرش - وزير يعني - ولا مؤاخذه

والراجل بصراحه كتر الف خيره كان حاسس بالمسئولية , كان راجل كبير كده وبيطلع يعيط من مجرد خبر في جرنان مش عارف يقوله للشعب ازاي .. مش عارف يصدمنا ازاي زي ما كان مصدوم .. مش عارف يحسسنا بحجم الكارثة ازاي

عشان كده الدنيا كلها زعلت يوم ما حصلت المشاكل واتشال من القناة الى الابد

انا لما بدأت اكتب الموضوع كنت هكتب قصة ساخرة بعنوان الواد بلال والقلّة المندسة بس قلت لما اوصل اللى انا عايزه علطول ميجراش حاجه .. سايبين افكار تانيه للقصص ده

لمن لا يعرف بلال هوا البطل اللى وقف لنظيف واتريق عليه من طلبة الجامعة , آي والله وقف لنظيف وطبعًا طلع عليه كلام - من عامة الشعب - انه من قلة الحكومة المندسة على الشعب بينما عممت الحكومة ان بلال واللى زيه والمدونين وشباب الفيس بوك هما دول القلة المندسة اللى بتحاول زعزعة أمن واستقرار مصر !

آه ده حقيقة علمية حتى بص لمراجع الجرايد القومية هتلاقي ان شباب مصر اللى خايفين عليها وبيطالبوا بانهاء الغلاء والبطالة وازمة العيش والمية والسكر والملح والفساد والواسطه والكوسه والرشوة والافترا بتاع الامن بقوا قلة مندسة

معارضين مصر الشرفاء اللى عرفوا ان المصيبة في رأس الافعى وبيتبهدلوا وبيطلع عين امهم في المعتقلات والتعذيب ومهددين في كل حاجه في حياتهم عشان شعوبهم ووطنهم بقوا قلّة مندسّة !

ولو جيت تبص لوجهة النظر الشعبية ففي ناس بتقرا جرايد وفرحانة بالتلاتين في المية والريس بريء من دم الشعب و حكومته مفترية واللي يتكلم على بابا مبارك يبقى وحش لان بابا مبارك قلبه على المواطنين يبقى فعلا الواد بلال من القلة المندسة و كذلك شباب الفيس بوك والمدونين بتوع المعارضة لانهم بيتكلموا على بابا مبارك , والاخوان تنظيم ارهابي , والاقباط واخدين حقوقهم تالت ومتلت , والحياة عندنا زي الفل .. من الآخر كده .. الحياة بقه لونها بمبي.. بمبييييييي

أما عمرو اديب وعادل امام - اللى عمل الزعيم - ومصطفى بكري وكرم جبر فدول قلبهم عالناس وبيفضحوا الفساد الصح حتى الحكومة بتستجيب !!

مصطفى بكري اللى بقه بيسافر على طيّارة الرئيس الخاصة وعمرو اديب اخو عماج الدين اديب والاتنين بيسقفوا للريّس في اول مؤتمر لما يكونوا في الصفّ الأول بس اعلاميًا بيحاربوا الفساد ويفضحوا القضية

قال ايه يا اخويا .. عمرو اديب بيقولك : لما قانون مكافحة الارهاب يتطبق الناس هتقول الرحمة يا حكومة رجعوا قانون الطواريء

الله اكبر .. المناضل الوطني اللى قلبه عالشعب يا عيني

لا وبيقولك برضه : دلوقتي بقه في حرية اختيار للرئيس , وبقه فيه عادي اي مواطن يقدر يرشح نفسه , واي مواطن يقدر يكلم اي وزير , آه والله حصل , كأن الأخ قاعد في النرويج

والمشكلة ان الدنيا كلها بتحترم الشرفاء اللى هما عمرو اديب وعادل امام - اللى جه في البيت بيتك يعارض الريس وراح يسهر معاه يوميها او تاني يوم مش فاكر تحديدًا !- وتامر أمين والناس المحترمة ده اللى قلبها عالشعب .. اصل العيب في الحكومة والريس اللى بيحط الحكومة بقاله 30 سنه ما يعرفش !
في رايي الشخصي

مبارك يستحق يخكم مصر فعلاً .. الراجل ده كاتب احلى مسرحية في التاريخ بتتطبق على الشعب المصري ,. معارضة تلاقي وحكومة تلاقي .. حرية تلاقي وقمع تلاقي .. اغنياء تلاقي وفقرا تلاقي .. ناس عايشة تلاقي وناس ميتة تلاقي .. التوازن المطلق .. مين صح ومين غلط ؟

فعلا الراجل ده لو كتب سيناريو فيلم اعتقد انه هيحوز كل جوائز الاوسكار بلا استثناء وهيبقى اعلى الافلام في الايرادات وأحلى فيلم في التاريخ وهتتضاف ثروة جديدة على ثروته

قشطة يا عم

انتا بقه يا عم الزائر , يا ريت تقول رايك

انتا شايف مين بالظبط القلة المندسة ؟

ان كنت انا منها

فتحيا

تحيا

تحيا

القلة المندسة !

***

لو لسّة ما قريتش قصّة أعصاب ممكن تشوفهَا هنا

http://kawarith.blogspot.com/2008/05/blog-post_22.html

اللي اختشوا ماتوا

بلوج جديد

عامله مخصوص عشان اخبار الصحف القومية اللى تجيب العته المنغولي

اللى هيا زي شيراك يأخذ الخبرة من مبارك

واخبار الاصلاح الاقتصادي كلها والبلد لسه بتتكلم في رغيف العيش

اصلاح اقتصادي ورغيف العيش مش موجود

طب ازاااااااااااي؟

افهمها دي !

مصر اشتغالات صحيح

المهم ان ده مش معارضة بس

البلوج ده دليل على ان اللي اختشوا ماتوا في كل زمان ومكان

وبما ان ده موضوع البداية فهحكيلكم قصة المثل المصري بتاع اللى اختشوا ماتوا

الموضوع وما فيه انه كان مرة فيه حمام .. حمام للاستحمام بس عمومي فيه قسم حريمي وقسم رجالي

فجأة شب حريق في الحمّام ده .. فالناس طلعوا يجروا وهما عريانين لغاية ما خرجوا برّه وهما ما صدقوا انهم عاشوا

فيه ناس اتكسفت واختشت على دمّها

قالوا هنطلع ازاي من الحمام قدام الناس عريانين كده

دول للاسف اتحرقوا في الحريقة

فطلع المثل

اللى اختشوا

ماتوا !